டாபோக்சிட்டின்

டபோக்செடின் என்பது மருத்துவரின் பரிந்துரையின் பேரில் பயன்படுத்தப்படும் மருந்தாகும். இது முக்கியமாக வயது வந்த ஆண்களுக்கு ஏற்படும் முன்கூட்டிய விந்து வெளியேற்றத்தைக் கட்டுப்படுத்தப் பயன்படுகிறது. சில நேரங்களில் பதற்றம் தொடர்பான பாதிப்புகளுக்கும் இந்த மருந்து பரிந்துரைக்கப்படலாம். டபோக்செடின் என்பது மூளையில் செரோட்டோனின் மீண்டும் உறிஞ்சப்படுவதைத் தடுக்கும் மருந்து வகையைச் சேர்ந்தது. இதன் மூலம் செரோட்டோனின் அளவைச் சீராக வைத்திருந்து, முன்கூட்டிய விந்து வெளியேற்றத்தைத் தாமதப்படுத்த உதவுகிறது. இந்த மருந்தை உட்கொள்வதால் தூக்கமின்மை, உடல் சோர்வு, தலைச்சுற்றல், தலைவலி மற்றும் குமட்டல் போன்ற பக்கவிளைவுகள் ஏற்படலாம்.

டபோக்செடினின் பயன்பாடுகள்

டபோக்செடின் முக்கியமாக முன்கூட்டிய விந்து வெளியேற்றத்தைக் கட்டுப்படுத்தவும், பதற்றம் தொடர்பான பாதிப்புகளைச் சமாளிக்கவும் பயன்படுத்தப்படுகிறது.

• முன்கூட்டிய விந்து வெளியேற்றத்திற்கான சிகிச்சை: டபோக்செடின், முன்கூட்டிய விந்து வெளியேற்றத்தைக் கட்டுப்படுத்த உதவுகிறது. இது மூளையில் செரோட்டோனின் மீண்டும் உறிஞ்சப்படுவதைத் தடுத்து, விந்து வெளியேறுவதைத் தாமதப்படுத்துகிறது.

• பதற்றத்தைக் கட்டுப்படுத்துதல்: மூளையில் செரோட்டோனின் அளவைச் சீராக வைத்திருக்க உதவுவதால், மருத்துவரின் பரிந்துரையின் பேரில் மட்டுமே பதற்றத்தைக் கட்டுப்படுத்த இந்த மருந்து பயன்படுத்தப்படலாம்.

டபோக்செடின் எவ்வாறு செயல்படுகிறது?

டபோக்செடின் மூளையில் செரோட்டோனின் மீண்டும் உறிஞ்சப்படுவதைத் தடுக்கிறது. இதனால் மூளையில் செரோட்டோனின் அளவு அதிகரித்து, விந்து வெளியேற்றத்தைத் தூண்டும் செயல்பாடு தாமதமாகிறது. இதன் மூலம் ஆண்கள் விந்து வெளியேற்றத்தைக் கட்டுப்படுத்த உதவுவதுடன், உடலுறவின்போது விந்து வெளியேறுவதற்கு எடுத்துக்கொள்ளும் நேரத்தையும் அதிகரிக்கிறது.

டபோக்செடினின் நன்மைகள்

• முன்கூட்டிய விந்து வெளியேற்றத்தைக் கட்டுப்படுத்த உதவுகிறது.
• பாலியல் செயல்திறனையும் தன்னம்பிக்கையையும் மேம்படுத்த உதவுகிறது.
• உடலுறவு நீடிக்கும் நேரத்தை அதிகரிக்க உதவலாம்.
• முன்கூட்டிய விந்து வெளியேற்றத்தால் ஏற்படும் மன அழுத்தம் மற்றும் பதற்றத்தைக் குறைக்க உதவுகிறது.

டபோக்செடினை எவ்வாறு எடுத்துக்கொள்ள வேண்டும்?

உடலுறவில் ஈடுபடுவதற்கு 1 முதல் 3 மணி நேரத்திற்கு முன்பு டபோக்செடினை எடுத்துக்கொள்ள வேண்டும். உணவு உட்கொண்ட பிறகோ அல்லது உணவு உட்கொள்ளாமலோ, ஒரு முழு குவளை தண்ணீருடன் மாத்திரையை முழுமையாக விழுங்க வேண்டும். 24 மணி நேரத்திற்குள் ஒன்றுக்கு மேற்பட்ட முறை இந்த மருந்தை எடுத்துக்கொள்ளக் கூடாது. மருந்தின் அளவு மற்றும் பயன்படுத்த வேண்டிய காலம் குறித்து மருத்துவர் கூறும் வழிமுறைகளைப் பின்பற்ற வேண்டும்.

கிடைக்கும் மருந்தளவுகள்

டபோக்செடின் 30 மி.கி. மற்றும் 60 மி.கி. அளவுகளில் மாத்திரைகளாகக் கிடைக்கிறது. உங்கள் உடல்நிலை, மருந்துக்குக் கிடைக்கும் பலன் மற்றும் ஒட்டுமொத்த உடல்நலத்தைப் பொறுத்து மருத்துவர் சரியான அளவைப் பரிந்துரைப்பார்.

டபோக்செடினின் பக்கவிளைவுகள்

டபோக்செடின் எடுத்துக்கொள்வதால் குமட்டல், தலைச்சுற்றல், தலைவலி, வயிற்றுப்போக்கு, தூக்கமின்மை மற்றும் உடல் சோர்வு போன்ற பக்கவிளைவுகள் ஏற்படலாம். அரிதான சில நேரங்களில் மயக்கம் அல்லது மனநிலையில் மாற்றங்கள் ஏற்படக்கூடும். கடுமையான அல்லது தொடர்ந்து நீடிக்கும் பக்கவிளைவுகள் ஏற்பட்டால் உடனடியாக மருத்துவரை அணுகவும். டபோக்செடினால் ஏற்படக்கூடிய பக்கவிளைவுகள் கீழே கொடுக்கப்பட்டுள்ளன:

• குமட்டல்
• தலைச்சுற்றல்
• தலைவலி
• வயிற்றுப்போக்கு
• தூக்கமின்மை
• உடல் சோர்வு
• அரிதாக, மயக்கம் அல்லது மனநிலையில் மாற்றங்கள்

பிற மருந்துகளுடன் ஏற்படும் இடைவினைகள்

டபோக்செடின் மற்ற மருந்துகளுடன் சேர்ந்து எடுத்துக்கொள்ளும்போது அவற்றுடன் வினைபுரியலாம். இதனால் மருந்தின் பாதுகாப்பு பாதிக்கப்படுவதுடன், பக்கவிளைவுகள் ஏற்படும் வாய்ப்பும் அதிகரிக்கலாம்.

• எம்.ஏ.ஓ. தடுப்பான்கள் மற்றும் செரோட்டோனின் அளவைப் பாதிக்கும் பிற மருந்துகள்: எம்.ஏ.ஓ. தடுப்பான்கள், எஸ்.எஸ்.ஆர்.ஐ. மருந்துகள் போன்ற செரோட்டோனின் அளவைப் பாதிக்கும் மருந்துகளுடன் டபோக்செடினை எடுத்துக்கொண்டால், மூளையில் செரோட்டோனின் அதிகமாகச் சேரக்கூடும். இதனால் குழப்பம், உடல் நடுக்கம், தசைப்பிடிப்பு மற்றும் தசைகளில் கட்டுப்பாடற்ற துடிப்பு போன்ற உயிருக்கு ஆபத்தான பாதிப்புகள் ஏற்படலாம். 
• கல்லீரல் நொதிகளின் செயல்பாட்டைத் தடுக்கும் மருந்துகள்: கல்லீரல் நொதிகளின் செயல்பாட்டைத் தடுக்கும் மருந்துகள், இரத்தத்தில் டபோக்செடினின் அளவை அதிகரிக்கலாம். இதனால் வலிப்பு, உடல் நடுக்கம், குறைந்த இரத்த அழுத்தம் மற்றும் இதயத் துடிப்பு அதிகரித்தல் போன்ற பாதிப்புகள் ஏற்படலாம்.  
• இரத்தம் உறைவதைத் தடுக்கும் மருந்துகள்: ஆஸ்பிரின் அல்லது வார்ஃபரின் போன்ற இரத்தம் உறைவதைத் தடுக்கும் மருந்துகளுடன் டபோக்செடினை எடுத்துக்கொண்டால், வழக்கத்திற்கு மாறான இரத்தப்போக்கு அல்லது உடலில் நீலக்காயங்கள் ஏற்படும் அபாயம் அதிகரிக்கலாம். 
• இதயத் துடிப்பு மற்றும் ஆணுறுப்பின் விறைப்புத்தன்மைக்கான மருந்துகள்: ஆணுறுப்பின் விறைப்புத்தன்மைக்கான மருந்துகள் அல்லது இதயத் துடிப்பைக் கட்டுப்படுத்தும் மருந்துகளுடன் டபோக்செடினை எடுத்துக்கொண்டால், இரத்த அழுத்தம் திடீரெனக் கடுமையாகக் குறைந்து மயக்கம் ஏற்படலாம்.
• மனநலப் பாதிப்புகளுக்கான மருந்துகள்: டபோக்செடின், தியோரிடசின் மருந்தின் சிதைவு செயல்முறையைத் தடுக்கலாம். இதனால் உடலில் அந்த மருந்தின் அளவு அதிகரித்து, இதயத் துடிப்பில் ஆபத்தான மாற்றங்கள் ஏற்படும் அபாயம் உள்ளது.

உணவுகளுடன் ஏற்படும் இடைவினைகள்

டபோக்செடின் எடுத்துக்கொள்ளும்போது உண்ணும் உணவுகள் மற்றும் பருகும் பானங்கள், உடலில் இந்த மருந்து உறிஞ்சப்படும் விதத்தையும் அதன் செயல்திறனையும் பாதிக்கலாம்.

• திராட்சைப்பழச் சாறு: இது கல்லீரல் நொதிகளின் செயல்பாட்டைத் தடுக்கிறது. இதனால் உடலில் டபோக்செடின் செயலாக்கப்படும் விதம் பாதிக்கப்பட்டு, இரத்தத்தில் அதன் அளவு அதிகரிக்கலாம். 
• மது: டபோக்செடின் எடுத்துக்கொள்ளும்போது மது அருந்தினால் தலைச்சுற்றல், உடல் இயக்கங்களைக் கட்டுப்படுத்துவதில் சிரமம் மற்றும் கடுமையான மயக்கம் ஏற்படும் அபாயம் அதிகரிக்கலாம்.
• செயின்ட் ஜான்ஸ் வோர்ட் மூலிகை: டபோக்செடின் எடுத்துக்கொள்ளும்போது இந்த மூலிகையைப் பயன்படுத்தினால், செரோட்டோனின் நச்சு பாதிப்பு ஏற்படலாம். இது உயிருக்கு ஆபத்தான நிலையை உருவாக்கக்கூடும்.

பாதுகாப்பு வழிமுறைகள்

• இதயப் பாதிப்புகள் அல்லது கடுமையான கல்லீரல் நோய் இருந்தால் டபோக்செடினைப் பயன்படுத்த வேண்டாம்.
• மது அருந்துவதைத் தவிர்க்கவும். ஏனெனில் இது தலைச்சுற்றல் மற்றும் பிற பக்கவிளைவுகளை அதிகரிக்கலாம்.
• 18 வயதுக்குக் குறைவானவர்கள் மற்றும் 65 வயதுக்கு மேற்பட்ட ஆண்கள் இந்த மருந்தைப் பயன்படுத்துவது பரிந்துரைக்கப்படுவதில்லை.
• தற்போது எடுத்துக்கொள்ளும் மருந்துகள் அல்லது உங்களுக்கு இருக்கும் உடல்நலப் பாதிப்புகள் குறித்து மருத்துவரிடம் தெரிவிக்கவும்.
• போதைப் பொருட்கள் அல்லது மனச்சோர்வுக்கான பிற மருந்துகளுடன் டபோக்செடினைச் சேர்த்து எடுத்துக்கொள்ள வேண்டாம்.