முடி உதிர்வுக்கு செலினியம்: நன்மைகள், பக்க விளைவுகள், அளவு மற்றும் இது உண்மையில் பலனளிக்குமா?

இன்றைய காலத்தில் முடி உதிர்தல் என்பது மிகவும் பொதுவான பிரச்சனையாகிவிட்டது. எங்கு பார்த்தாலும் உதிர்ந்த முடிகளை காணும்போது யாருக்கும் கவலை ஏற்படுவது இயல்புதான். 

முடி உதிர்வதற்கான முக்கிய காரணங்களில் ஒன்று உணவில் சில அத்தியாவசிய சத்துக்கள் குறைவாக இருப்பது. அவற்றில் முக்கியமான ஒன்று செலினியம் ஆகும்.

இந்த நுண்ணூட்டத் தாது முடியின் ஆரோக்கியத்திற்கு எவ்வாறு உதவுகிறது என்பது குறித்து பலருக்கும் முழுமையான தகவல் தெரியாது. அதைப் பற்றி எளிமையாக விளக்குவதற்காகவே இந்த பதிவு உருவாக்கப்பட்டுள்ளது.

இந்த பதிவில், செலினியம் முடியின் ஆரோக்கியத்தில் வகிக்கும் பங்கு, அதன் குறைபாட்டை அறியும் அறிகுறிகள், அதை எவ்வாறு சரிசெய்வது, மேலும் அளவுக்கு அதிகமாக எடுத்துக்கொள்ளும்போது ஏன் எச்சரிக்கையாக இருக்க வேண்டும் என்பதையும் பார்க்கலாம்.

செலினியம் என்றால் என்ன?

செலினியம் என்பது நம் உடலுக்கு மிகச் சிறிய அளவில் மட்டுமே தேவையான ஒரு நுண்ணூட்டத் தாது. இது உடலில் செல்களை சேதத்திலிருந்து பாதுகாக்க உதவும் சிறப்பு புரதங்களை உருவாக்குவதில் முக்கிய பங்கு வகிக்கிறது. மேலும் உடலின் பல முக்கிய செயல்பாடுகளுக்கும் இது ஆதரவாக செயல்படுகிறது.

செலினியத்தின் முக்கிய செயல்பாடுகள்:

• செல்களை பாதுகாக்கும் செயல்பாடு
• உடல் சுரப்பி சுரக்கும் வேதிப்பொருட்களின் மாற்றச் செயலுக்கு ஆதரவு
• நோய் எதிர்ப்பு சக்திக்கு துணை
• ஆண் இனப்பெருக்க அணுக்களின் இயல்பான இயக்கத்திற்கு உதவி
  
  

செலினியம் உடலுக்கு அவசியமான சத்து என்றாலும், தேவையை விட அதிகமாக எடுத்துக்கொள்வதால் கூடுதல் நன்மை கிடைக்காது. மாறாக அது உடலுக்கு தீங்கு விளைவிக்கக்கூடும்.

ஆரோக்கியமான முடி வளர்ச்சிக்கு செலினியம் எவ்வாறு உதவுகிறது?

செலினியம் உங்கள் முடியின் ஆரோக்கியத்தை எந்த வகையில் ஆதரிக்கிறது என்பதை இந்தப் பகுதியில் விரிவாக அறிந்து கொள்ளலாம். 

முடி வேர்களை செல்சேதத்திலிருந்து பாதுகாக்கிறது

முடி வளரும் வேர்ப்பகுதிகள் தினமும் செல்களுக்கு சேதம் விளைவிக்கக்கூடிய தீங்கு தரும் மூலக்கூறுகளின் தாக்கத்திற்கு ஆளாகின்றன. அவற்றிலிருந்து பாதுகாப்பதற்கு செலினியம் உதவுகிறது.

• செல்களை பாதுகாக்கும் இயற்கை பாதுகாப்பை மேம்படுத்துகிறது
• செல்சேதத்தை ஏற்படுத்தும் அழுத்தத்தை குறைக்கிறது
• முடி வேர்களில் செல்கள் சேதமடைவதைத் தடுக்கிறது
• முடி ஆரோக்கியமாக வளர ஏற்ற சூழலை உருவாக்குகிறது

தைராய்டு சுரப்பி ஆரோக்கியமாக செயல்பட உதவுகிறது

முடி இயல்பாக வளர தைராய்டு சுரப்பியின் செயல்பாடும் மிகவும் முக்கியமானது. அதற்கு செலினியம் பின்வரும் வகையில் உதவுகிறது. 

• செயலற்ற தைராய்டு சுரப்பி வேதிப்பொருளை செயல்படும் வடிவமாக மாற்ற உதவுகிறது
• தைராய்டு சுரப்பி இயல்பாக செயல்பட ஆதரிக்கிறது
• தைராய்டு கோளாறுகளால் ஏற்படும் முடி உதிர்வை குறைக்க உதவுகிறது
• தைராய்டு தொடர்பான தற்காலிக முடி உதிர்விலிருந்து மீள உதவுகிறது
  
  

மேலும் படிக்க: தைராய்டு பிரச்சனை உள்ளவர்கள் சாப்பிட ஏற்ற சிறந்த உணவுகள் 

முடி வளர்ச்சியின் இயல்பான சுழற்சிக்கு ஆதரவளிக்கிறது

இயல்பாக முடி வளர்ச்சி மூன்று நிலைகளில் நடைபெறுகிறது:

• முதல் நிலை - செயலில் இருக்கும் வளர்ச்சி நிலை
• இரண்டாம் நிலை - மாற்றம் நடைபெறும் இடைநிலை
• மூன்றாம் நிலை - ஓய்வு மற்றும் முடி உதிரும் நிலை
  
  

செலினியம் மிகவும் குறைவாக இருந்தாலும் அல்லது அளவுக்கு அதிகமாக இருந்தாலும், இந்த இயல்பான வளர்ச்சி சுழற்சி பாதிக்கப்பட்டு முடி உதிர்வு அதிகரிக்கலாம்.

முடி உதிர்வுக்கு செலினியம் உதவுமா? ஆய்வுகள் என்ன கூறுகின்றன?

இதற்கான பதில் மிகவும் எளிமையானது. உடலில் செலினியம் உண்மையாகவே குறைவாக இருந்தால் மட்டுமே, அதை சரிசெய்வதன் மூலம் முடி வளர்ச்சிக்கு உதவக்கூடும். 

ஏற்கனவே உடலில் செலினியம் போதுமான அளவில் உள்ளவர்களுக்கு, கூடுதலாக எடுத்துக்கொள்ளும் ஊட்டச்சத்து மாத்திரைகளால் குறிப்பிடத்தக்க நன்மை கிடைப்பதாக ஆய்வுகள் காட்டவில்லை.

ஆய்வுகள் கூறும் தகவல்கள்

இதுவரை செய்யப்பட்ட ஆய்வுகளின்படி, செலினியம் பின்வரும் வழிகளில் பயனளிக்கக்கூடும்:

• செலினியக் குறைபாட்டை சரிசெய்வது
• செல்களை சேதத்திலிருந்து பாதுகாப்பது
• தைராய்டு சுரப்பி இயல்பாக செயல்பட உதவுவது
• முடி வேர்களை செல்சேதத்திலிருந்து பாதுகாப்பது

தற்போதைய ஆய்வுகளின் வரம்புகள் என்ன?

• மனிதர்களை அடிப்படையாகக் கொண்ட ஆய்வுகள் மிகவும் குறைவாக உள்ளன.
• விலங்குகளில் செய்யப்பட்ட ஆய்வுகள் நல்ல முடிவுகளை காட்டினாலும், அதே முடிவுகளை மனிதர்களுக்கும் பொருந்தும் என்று உறுதியாகக் கூற முடியாது.

ஆய்வுகள் இதை நிரூபிக்கவில்லை

இதுவரை மேற்கொள்ளப்பட்ட எந்த ஆய்வும் செலினியம் குறித்து பின்வருவனவற்றை நிரூபிக்கவில்லை:

• முடியை அதிசயமாக வளர்க்கும் ஒரு ஊட்டச்சத்து என்று
• பொதுவாக காணப்படும் முடி உதிர்வு வகையை முழுமையாகத் தடுக்கிறது என்று
• உடலில் செலினியம் ஏற்கனவே போதுமான அளவில் உள்ள ஆரோக்கியமானவர்களுக்கு முடி வளர்ச்சியை அதிகரிக்கிறது என்று
  
  

பல வணிக நோக்கிலான முடி ஆரோக்கிய ஊட்டச்சத்து தயாரிப்புகளில், அவசியமில்லாத சூழல்களிலும் செலினியம் சேர்க்கப்பட்டிருப்பதை காணலாம்.

செலினியத்தால் அதிக நன்மை பெறக்கூடியவர்கள் யார்?

செலினியம் எடுத்துக்கொண்டால் அனைவருக்கும் நன்மை கிடைக்கும் என்பது நிரூபிக்கப்படவில்லை. குறிப்பிட்ட சிலருக்கு மட்டுமே செலினியக் கூடுதல் ஊட்டச்சத்து மூலம் முடி உதிர்வில் முன்னேற்றம் காணப்படலாம். அவர்கள்:

• பரிசோதனையில் உறுதிப்படுத்தப்பட்ட செலினியக் குறைபாடு உள்ளவர்கள்
• ஊட்டச்சத்து குறைபாடு உள்ளவர்கள்
• உணவில் உள்ள சத்துக்கள் உடலில் உறிஞ்சப்படுவதை பாதிக்கும் செரிமானக் கோளாறுகள் உள்ளவர்கள்
• நீண்டகாலமாக நரம்பு வழியாக ஊட்டச்சத்து பெறுபவர்கள்
• சில வகையான தைராய்டு சுரப்பி கோளாறுகள் உள்ளவர்கள்
• மருத்துவரால் உறுதிப்படுத்தப்பட்ட ஊட்டச்சத்து குறைபாடு உள்ளவர்கள்
  
  

ஆரோக்கியமாக இருக்கும் பெரும்பாலானவர்களுக்கு செலினியக் குறைபாடு அரிதாகவே காணப்படுகிறது. எனவே, முடி உதிர்வை குறைப்பதற்காக அவர்கள் தனியாக செலினியக் கூடுதல் ஊட்டச்சத்தை எடுத்துக்கொள்ள வேண்டிய அவசியம் பொதுவாக இருப்பதில்லை.

உங்கள் முடி உதிர்வுக்கு செலினியக் குறைபாடே காரணமாக இருக்கலாம் என்பதைக் காட்டும் அறிகுறிகள்

இயல்பை விட அதிகமாக முடி உதிர்வதற்கு பல காரணங்கள் இருக்கலாம். அது செலினியக் குறைபாட்டால் தான் ஏற்பட்டுள்ளது என்று தானாகவே கருதுவது சரியான தீர்வைத் தராது.

எனவே, அடுத்த கட்ட நடவடிக்கைகளை எடுப்பதற்கு முன் உண்மையான காரணத்தை கண்டறிவது அவசியம். செலினியக் குறைபாடு காரணமாக முடி உதிர்ந்தால், பின்வரும் அறிகுறிகள் காணப்படலாம்:

• தொடர்ச்சியான சோர்வு
• அதிக அளவில் முடி உதிர்தல்
• எளிதில் உடையும் நகங்கள்
• அடிக்கடி தொற்று ஏற்படுதல்
• செரிமானக் கோளாறுகள்
• தைராய்டு சுரப்பி நோய்
• போதிய சத்துக்கள் இல்லாத அல்லது மிகவும் கட்டுப்படுத்தப்பட்ட உணவுமுறை

அளவுக்கு அதிகமான செலினியம் முடி உதிர்வை ஏற்படுத்துமா?

ஆம். உண்மையில், செலினியக் குறைபாட்டால் ஏற்படும் முடி உதிர்வை விட, உடலில் செலினியம் அதிகமாக இருப்பதால் ஏற்படும் முடி உதிர்வைப் பற்றிய ஆதாரங்கள் அதிகமாக உள்ளன.

உடலில் செலினியம் தேவைக்கு அதிகமாக சேர்ந்தால், செலினிய நச்சுத்தன்மை ஏற்படலாம். இதைத் தவிர்க்க, ஒரு நாளுக்கு 400 நுண்ணளவை விட அதிகமாக செலினியம் எடுத்துக்கொள்ளக் கூடாது. 

செலினிய நச்சுத்தன்மையின் அறிகுறிகள்: 

• பூண்டு போன்ற மணம் வீசும் மூச்சு
• தலைமுழுவதும் பரவலாக முடி உதிர்தல்
• எளிதில் உடையும் மற்றும் நிறம் மாறிய நகங்கள்
• வாயில் உலோகச் சுவை உணர்தல்
• குமட்டல்
• சோர்வு
• செரிமானப் பிரச்சனைகள்

செலினிய நச்சுத்தன்மை ஏற்படுவதற்கான பொதுவான காரணங்கள்

• அதிக அளவிலான செலினியக் கூடுதல் ஊட்டச்சத்து எடுத்துக்கொள்வது
• பல வகையான பல்சத்து மாத்திரைகளை ஒரே நேரத்தில் பயன்படுத்துவது
• பிரேசில் கொட்டைகளை அதிகமாக சாப்பிடுவது
• கூடுதல் ஊட்டச்சத்தின் அளவை தவறாக பயன்படுத்துவது

ஒரு நாளுக்கு எவ்வளவு செலினியம் தேவை?

முன்னைய பகுதிகளில் பார்த்ததுபோல், செலினியம் குறைவாக இருந்தாலும், அளவுக்கு அதிகமாக இருந்தாலும் முடி உதிர்வு ஏற்படலாம். எனவே, வயது மற்றும் உடல்நிலைக்கு ஏற்ப தேவையான அளவை மட்டும் எடுத்துக்கொள்வது மிகவும் முக்கியம். அதற்கான எளிய வழிகாட்டி கீழே கொடுக்கப்பட்டுள்ளது.

முடி வளர்ச்சிக்கு உதவும் செலினியம் நிறைந்த சிறந்த உணவுகள்

ஊட்டச்சத்து குறைபாட்டை சரிசெய்ய இயற்கையான உணவுகளை தினசரி உணவில் சேர்ப்பதே சிறந்த மற்றும் எளிய வழியாகும். செலினியம் அதிகமாக உள்ள சில உணவுகள் கீழே கொடுக்கப்பட்டுள்ளன:

இயற்கையாக செலினியத்தின் அளவை அதிகரிக்கும் பயனுள்ள வழிகள்

இயற்கை உணவுகளை விட கூடுதல் ஊட்டச்சத்து மாத்திரைகளை எடுத்துக்கொள்வது எளிதாகத் தோன்றலாம். ஆனால், சரியான உணவுமுறையைப் பின்பற்றுவதன் மூலம் தேவையான செலினியத்தை இயற்கையாகவே பெற முடியும். அதற்காக எளிய மற்றும் நடைமுறைக்கு ஏற்ற உணவுத் திட்டம் கீழே கொடுக்கப்பட்டுள்ளது. 

முடி உதிர்வுக்கு செலினியக் கூடுதல் ஊட்டச்சத்து எடுத்துக்கொள்ள வேண்டுமா?

அனைவரும் செலினியக் கூடுதல் ஊட்டச்சத்தை எடுத்துக்கொள்ள வேண்டிய அவசியமில்லை. செலினியக் குறைபாட்டிற்கான அறிகுறிகள் இருந்தாலும், மருத்துவ நிபுணர் பரிந்துரைத்தாலும் மட்டுமே அதை பயன்படுத்த வேண்டும்.

கூடுதல் ஊட்டச்சத்தை எடுத்துக்கொள்வதற்கு முன் பின்வருவனவற்றை கவனிக்கவும்:

• நீங்கள் ஏற்கனவே பயன்படுத்தும் பல்சத்து மாத்திரையில் செலினியம் உள்ளதா என்பதை உறுதிப்படுத்துங்கள்.
• ஒரே நேரத்தில் ஒன்றுக்கு மேற்பட்ட செலினியக் கூடுதல் ஊட்டச்சத்துகளை பயன்படுத்த வேண்டாம்.
• மருத்துவரின் ஆலோசனை இல்லாமல் முடி உதிர்வுக்கு செலினியத்தை சிகிச்சையாக பயன்படுத்த வேண்டாம்.
  
  

மேலும் படிக்க: முடி வளர்ச்சிக்கு எந்த உயிர்ச்சத்து சிறந்தது? வலிமையான மற்றும் ஆரோக்கியமான முடிக்கான சிறந்த உயிர்ச்சத்துகள்

செலினியம் எவ்வளவு காலத்தில் பலன் அளிக்கும்?

செலினியக் குறைபாடு காரணமாக முடி உதிர்வு ஏற்பட்டிருந்தால், கூடுதல் ஊட்டச்சத்து மற்றும் செலினியம் நிறைந்த உணவுகளை எடுத்துக்கொள்ளத் தொடங்கியவுடன் உடனடியாக பலன் கிடைக்கும் என்று எதிர்பார்க்க வேண்டாம். பின்வரும் விஷயங்களை நினைவில் கொள்ளுங்கள்:

• உடலில் செலினியக் குறைபாடு இருந்தால் மட்டுமே இது பயனளிக்கும்.
• முடி இயல்பாக மெதுவாகவே வளரும்.
• கண்கூடாக மாற்றம் தெரியும் வரை மூன்று முதல் ஆறு மாதங்கள் வரை ஆகலாம்.
• அளவுக்கு அதிகமாக எடுத்துக்கொள்வதால் முடி வேகமாக வளராது.

முடிக்கான செலினியம் குறித்து நிலவும் தவறான நம்பிக்கைகளும் உண்மைகளும்

முடி ஆரோக்கியத்தில் செலினியத்தின் பங்கு குறித்து பல தவறான நம்பிக்கைகள் பரவி வருகின்றன. பிறர் சொல்வதையெல்லாம் நம்பாமல், உண்மையான தகவல்களை தெரிந்துகொள்வது முக்கியம்.

யார் செலினியக் கூடுதல் ஊட்டச்சத்தை தவிர்க்க வேண்டும்?

மருத்துவ நிபுணரின் பரிந்துரையின் பேரில் மட்டுமே செலினியக் கூடுதல் ஊட்டச்சத்தை எடுத்துக்கொள்ள வேண்டும். பின்வரும் நபர்களுக்கு இது பொருத்தமில்லாமல் இருக்கலாம்:

• ஏற்கனவே செலினியம் உள்ள பல்சத்து மாத்திரைகளை பயன்படுத்துபவர்கள்
• பிரேசில் கொட்டைகளை அடிக்கடி சாப்பிடுபவர்கள்
• சிறுநீரக நோய் உள்ளவர்கள் (முதலில் மருத்துவரின் ஆலோசனையைப் பெற வேண்டும்)
• குழந்தைகள் (மருத்துவர் பரிந்துரைத்தால் மட்டுமே)
• கர்ப்பிணிப் பெண்கள் அல்லது தாய்ப்பால் கொடுக்கும் பெண்கள் (மருத்துவ ஆலோசனையின் பேரில் மட்டும்)

செலினியக் கூடுதல் ஊட்டச்சத்தின் சாத்தியமான பக்கவிளைவுகள்

அளவுக்கு அதிகமாக செலினியம் எடுத்துக்கொண்டால் பின்வரும் பக்கவிளைவுகள் ஏற்படலாம்:

• குமட்டல் மற்றும் வயிற்றுக் கோளாறு
• வாயில் உலோகச் சுவை தோன்றுதல்
• பூண்டு போன்ற மணம் வீசும் மூச்சு
• முடி உதிர்தல் மற்றும் எளிதில் உடையும் நகங்கள்
• நீண்டகாலமாக அதிக அளவில் எடுத்துக்கொண்டால் செலினிய நச்சுத்தன்மை ஏற்படுதல்

எப்போது மருத்துவரை அணுக வேண்டும்?

ஒரு நாளுக்கு ஐம்பது முதல் நூறு முடிகள் வரை உதிர்வது இயல்பானது. ஆனால் அதைவிட அதிகமாக முடி உதிர்ந்தால், அதற்கான காரணத்தை கண்டறிவது அவசியம். பின்வரும் சூழ்நிலைகளில் மருத்துவரை அணுகுவது நல்லது:

• திடீரென அதிக அளவில் முடி உதிர்வது
• சில இடங்களில் மட்டும் முடி உதிர்வது
• பல மாதங்களாக தொடர்ந்து முடி உதிர்வது
• தைராய்டு சுரப்பி கோளாறுகளுக்கான அறிகுறிகள் இருப்பது
• ஊட்டச்சத்து குறைபாடு இருக்கலாம் என்ற சந்தேகம்

சரியான பரிசோதனைகள் மூலம் முடி உதிர்வதற்கான உண்மையான காரணத்தை கண்டறிய முடியும். அதன்பிறகு செலினியம் தேவையா இல்லையா என்பதையும் மருத்துவர் துல்லியமாக தீர்மானிக்க முடியும்.

மேலும் படிக்க: திடீர் முடி உதிர்வதற்கான முக்கிய காரணங்கள்

முடிவுரை

மொத்தத்தில், உடலில் செலினியக் குறைபாடு இருந்தால் மட்டுமே செலினியம் முடி உதிர்வை கட்டுப்படுத்த உதவக்கூடும். குறைபாடு இல்லாமல் அதை எடுத்துக்கொள்வதால் முடி வளர்ச்சி அதிகரிக்காது. மாறாக தேவையற்ற பாதிப்புகள் ஏற்படும் வாய்ப்பு உள்ளது.

மருத்துவரின் ஆலோசனை இல்லாமல் தானாகவே மருந்து அல்லது கூடுதல் ஊட்டச்சத்தை பயன்படுத்துவதைத் தவிர்க்க வேண்டும். முடி உதிர்வதற்கான உண்மையான காரணத்தை கண்டறிந்து, அதற்கேற்ற சிகிச்சையைப் பெறுவது மிகவும் முக்கியம். 

உடலில் செலினியக் குறைபாடு இருப்பது உறுதியாகத் தெரிந்தால், மருத்துவரின் ஆலோசனைப்படி கூடுதல் ஊட்டச்சத்தை பயன்படுத்தலாம். அல்லது பிரேசில் கொட்டைகள், சூரை மீன், மத்தி மீன், முட்டை போன்ற இயற்கையான உணவுகளின் மூலமாகவும் செலினியத்தைப் பெறலாம்.