மழைநீர் கூந்தலுக்கு நல்லதா அல்லது கெட்டதா? நீங்கள் தெரிந்து கொள்ள வேண்டிய அனைத்தும்.

மழையில் நனைவது நம் சிறுவயது நினைவுகளை மீண்டும் கொண்டு வரும் ஒரு மகிழ்ச்சியான அனுபவம். ஆனால் இந்த மகிழ்ச்சி முடிந்த பிறகு உங்கள் தலைமுடியில் ஏற்படும் மாற்றங்களை கவனித்திருக்கிறீர்களா?

உங்கள் தலைமுடி சிக்கலாகவும், கரடுமுரடாகவும், எண்ணெய்ப்பசையுடனும், சீவி பராமரிக்க கடினமாகவும் மாறலாம். இதற்கு மழைநீரும் ஒரு காரணமாக இருக்கலாம். இன்றைய அதிகரித்து வரும் காற்று மாசுபாட்டால் மழைநீர் எப்போதும் தூய்மையாக இருப்பதில்லை.

மழைநீர் தலைமுடியில் ஏற்படுத்தும் தாக்கங்கள், அதற்கான காரணங்கள் மற்றும் தலைமுடியை பளபளப்பாகவும் ஆரோக்கியமாகவும் பராமரிப்பதற்கான வழிமுறைகள் குறித்து நீங்கள் தெரிந்துகொள்ள வேண்டிய அனைத்தையும் இந்தக் கட்டுரை விளக்குகிறது.

மழைநீர் தலைமுடிக்கு நல்லதா அல்லது தீமையானதா?

இயற்கையாகவே மழைநீர் மென்மையானது என்பதால், அது தலைமுடியை மென்மையாகவும் பட்டுப் போலவும் மாற்றக்கூடும். ஆனால் காற்றில் அதிகரித்து வரும் மாசுபாட்டின் காரணமாக, மழைத்துளிகள் தரையை அடையும் முன்பே தூசி, நுண்ணிய மாசுத்துகள்கள் மற்றும் அமிலத் தன்மை கொண்ட துகள்களை தன்னுடன் சேர்த்துக்கொள்ளலாம். இத்தகைய மாசுத்துகள்கள் தலையோட்டிலும் தலைமுடியிலும் எதிர்மறையான தாக்கத்தை ஏற்படுத்தக்கூடும். 

இதனால் தலைமுடிக்கு பாதிப்பை ஏற்படுத்துவது மழை மட்டுமல்ல, மாசுபட்ட சுற்றுச்சூழலும் முக்கிய காரணம் என்பது தெளிவாகிறது.

மழைநீர் நல்லதா அல்லது தீமையானதா என்ற கேள்விக்கு, நீங்கள் வசிக்கும் இடம், அங்குள்ள காற்றின் தரம் மற்றும் மழைக்குப் பிறகு தலைமுடியை எவ்வாறு பராமரிக்கிறீர்கள் என்பதன் அடிப்படையில் பதில் மாறுபடும்.

மழைநீர் தலைமுடி உதிர்வை ஏற்படுத்துமா?

மழைநீர் மட்டும் நேரடியாக தலைமுடி உதிர்வை ஏற்படுத்தாது. இருப்பினும், மழைக்காலத்தில் காணப்படும் சில சூழ்நிலைகள் தலைமுடி உதிர்வையும் உடைவையும் அதிகரிக்கக்கூடும்.

இதையும் படிக்கவும்: மழைக்காலத்தில் முடி உதிர்வு

மழைநீர் தலைமுடிக்கு நல்லதா? 

பல ஆண்டுகளாக, தலைமுடியை மென்மையாகவும் பளபளப்பாகவும் வைத்திருக்க மழைநீர் சிறந்தது என்று பலர் கருதி வந்துள்ளனர். ஆனால் இன்றைய சூழலில், மாசுபாடு குறைவாக உள்ள இடங்களில் வசிக்கும் போது மட்டுமே இந்த நன்மைகள் கிடைக்கக்கூடும்.

மழைநீர் தலைமுடிக்கு நன்மையாக இருப்பதற்கான காரணங்கள்:

• மென்மையான நீர்: கடினமான நீருடன் ஒப்பிடும்போது இதில் தாதுப்பொருட்கள் குறைவாக உள்ளன.
• குறைந்த தாதுப்பொருள் அளவு: தலைமுடியில் தாதுப்பொருட்கள் படிந்து சேர்வதைத் தடுக்கிறது.
• தலைமுடி மென்மையாக உணரப்படும்: உங்கள் தலைமுடி பட்டுப் போலவும் தொடுவதற்கு மென்மையாகவும் மாறக்கூடும்.
• பாரம்பரியப் பயன்பாடு: குழாய் மூலம் நீர் கிடைக்காத இடங்களில், மழைநீரைச் சேகரித்து தலைமுடியைக் கழுவுவதற்குப் பயன்படுத்தி வந்துள்ளனர்.

மழைநீர் தலைமுடியை ஏன் பாதிக்கிறது?

மழைநீரின் தரம் மற்றும் அதைச் சுற்றியுள்ள சுற்றுச்சூழலைப் பொறுத்து, அது தலைமுடியில் வெவ்வேறு விதமான தாக்கங்களை ஏற்படுத்தக்கூடும்.

மழைநீர் தலைமுடிக்கு எப்போது தீங்கு விளைவிக்கும்? 

ஆம், மழைநீர் உங்கள் தலைமுடியில் சில பாதிப்புகளை ஏற்படுத்தக்கூடும். நகரங்களிலும் அதைச் சுற்றியுள்ள பகுதிகளிலும் காற்று மாசுபாடு தொடர்ந்து அதிகரித்து வருவதால், மழைநீர் எப்போதும் தூய்மையான நிலையில் இருப்பதில்லை.

மழையுடன் ஏற்படும் சுற்றுச்சூழல் மாற்றங்களும், மாசுத்துகள்களும் உங்கள் தலைமுடிக்கு பாதிப்பை ஏற்படுத்துவதற்கான முக்கிய காரணங்களாக உள்ளன:

• காற்று மாசுபாடு மற்றும் சுற்றுச்சூழல் மாசுத்துகள்கள்: புகை, வாகனங்களில் இருந்து வெளியேறும் புகைத்துகள்கள், தூசி மற்றும் அழுக்கு போன்றவை மழைநீருடன் கலந்துவிடலாம். இவை தலைமுடி மற்றும் தலையோட்டுக்குத் தீங்கு விளைவிக்கக்கூடும். 
• அமில மழை: கந்தகம் மற்றும் நைட்ரஜன் சேர்மங்கள் உள்ளிட்ட தொழிற்சாலைகளில் இருந்து வெளியேறும் தீங்கு விளைவிக்கும் பொருட்கள் மழைநீருடன் கலக்கும்போது அமிலத் தன்மை கொண்ட மழை உருவாகிறது. இதனால் தலையோட்டின் இயற்கையான அமில-கார சமநிலை மாறக்கூடும்.
• நுண்ணுயிரிகள் மற்றும் பூஞ்சை வளர்ச்சி: தலையோடு நீண்ட நேரம் ஈரமாக இருக்கும்போது நுண்ணுயிரிகள் அல்லது பூஞ்சைகள் வளரக்கூடும். இதனால் தலையோட்டில் தொற்று ஏற்படலாம்.
• காற்றின் ஈரப்பதம்: மழைக்கால நாட்களில் காற்றில் ஈரப்பதத்தின் அளவு அதிகரிக்கும். இதனால் தலைமுடி சுருண்டு, கட்டுப்பாடின்றி காணப்படலாம். 

மழைநீர் தலைமுடியில் ஏற்படுத்தும் எதிர்மறையான பாதிப்புகள்

மழைக்காலம் வந்துவிட்டால் நமது தலைமுடி பல பிரச்சினைகளுக்கு உள்ளாகிறது. தலைமுடி எப்போதும் சுருண்டும், உலர்ந்தும் காணப்படுவதுடன், தொடர்ந்து உதிரவும் தொடங்குகிறது. அப்படியானால் மழைநீர் தலைமுடியில் என்ன தாக்கத்தை ஏற்படுத்துகிறது? 

மழைநீர் தலைமுடியில் உள்ள இயற்கையான எண்ணெய்ப்பசையை அகற்றக்கூடும். மாசுத்துகள்கள் காரணமாக தலையோட்டில் தொற்று ஏற்படுவதற்கான வாய்ப்பை அதிகரிக்கலாம். மேலும், தலைமுடி சுருட்டாகவும், அதிகமாக உதிரவும் செய்யக்கூடும். 

குறிப்பாக தலைமுடி மழைநீருடன் நேரடியாகத் தொடர்பு கொள்ளும்போது, பலருக்கும் இதுபோன்ற தலைமுடிப் பிரச்சினைகள் ஏற்படுகின்றன.

மழையில் நனைந்த பிறகு தலைமுடியைக் கழுவ வேண்டுமா?

பெரும்பாலான நேரங்களில், ஆம். மழைநீரில் என்னென்ன பொருட்கள் கலந்துள்ளன என்பது நமக்குத் தெரியாது. எனவே, முடிந்தால் மழையில் நனைந்த பிறகு தலைமுடியைக் கழுவுவது நல்லது.

எவ்வளவு நேரம் மற்றும் எவ்வளவு அதிகமாக மழை பெய்தது, நீங்கள் இருக்கும் இடம் போன்றவற்றையும் கருத்தில் கொண்டு தலைமுடியைக் கழுவுவதா என்பதைத் தீர்மானிக்கலாம். எடுத்துக்காட்டாக - 

மழைநீரால் தலைமுடியைக் கழுவுவது பாதுகாப்பானதா?

ஆம், சில குறிப்பிட்ட சூழ்நிலைகளில் மழைநீரால் தலைமுடியைக் கழுவுவது பாதுகாப்பாகவும் பயனுள்ளதாகவும் இருக்கலாம். ஆனால் அந்த நீர் எங்கு, எவ்வாறு சேகரிக்கப்பட்டது என்பதே அதன் பாதுகாப்பைத் தீர்மானிக்கும் முக்கிய காரணமாகும்.

• சேகரிக்கப்பட்ட மழைநீர்: சரியான சுகாதார முறையில் சேமித்து வைக்கப்பட்டிருந்தால் மட்டுமே பயன்படுத்தவும்.
• வடிகட்டிய மழைநீர்: சுத்திகரிக்கப்படாமல் சேகரிக்கப்பட்ட மழைநீரைவிட இது மிகவும் பாதுகாப்பானது.
• நகர்ப்புறம் மற்றும் கிராமப்புறம்: அதிக மாசுபாடு உள்ள நகரங்களின் மழைநீருடன் ஒப்பிடும்போது, கிராமப்புறங்களில் கிடைக்கும் மழைநீர் பொதுவாகத் தூய்மையாக இருக்கக்கூடும்.
• முதல் மழை மற்றும் அடுத்தடுத்த மழை: முதல் மழை காற்றில் உள்ள தூசி மற்றும் மாசுத்துகள்களைத் தரையுடன் சேர்த்து அகற்றக்கூடும். எனவே, அதன் பிறகு பெய்யும் மழை பொதுவாகத் தூய்மையாக இருக்கலாம்.

மழைநீரில் இருந்து தலைமுடியை எவ்வாறு பாதுகாப்பது?

சில நேரங்களில் மழை எப்போது பெய்யும் என்பது நமக்குத் தெரியாமல் போகலாம். மழைநீரால் பொதுவாக ஏற்படும் தலைமுடிப் பிரச்சினைகளைத் தவிர்க்க சில முக்கியமான முன்னெச்சரிக்கை நடவடிக்கைகளைப் பின்பற்றுவது அவசியம். அவற்றில் சில:

• குடையை எடுத்துச் செல்லுங்கள் அல்லது தலைக்கவசம் அணியுங்கள்.
• தலைமுடியை நீண்ட நேரம் ஈரமாக வைத்திருக்க வேண்டாம்.
• வீட்டிற்கு வந்த பிறகு தலையோட்டை மெதுவாகத் துடைத்து உலர்த்துங்கள்.
• ஈரமான தலைமுடியைக் கட்ட வேண்டாம்.
• பலத்த மழையில் நனைந்த பிறகு மென்மையான மழைக்கால தலைமுடி கழுவும் திரவம் கொண்டு தலைமுடியைக் கழுவுங்கள்.
• தொடர்ந்து தலைமுடிக்குப் பதப்படுத்தியைப் பயன்படுத்துங்கள்.
• அதிக வெப்பத்தைப் பயன்படுத்தி தலைமுடியை அலங்கரிப்பதைத் தவிர்க்கவும்.

மழையில் நனைந்த பிறகு தலைமுடியைப் பராமரிக்கும் முறை

மூன்று பொருட்களை மட்டும் கொண்ட எளிய தலைமுடிப் பராமரிப்பு முறையைப் பின்பற்றுவது தலைமுடியின் ஆரோக்கியத்திற்கு மிகவும் பயனுள்ளதாக இருக்கும். அவை மென்மையான தலைமுடி கழுவும் திரவம், தலைமுடி மென்மைப்படுத்தி மற்றும் தலைமுடி சுருட்டலைக் கட்டுப்படுத்தும் சீரம் ஆகியவையாகும். 

மழையில் நனைந்துவிட்டால், வீட்டிற்கு வந்த பிறகு பின்வரும் பராமரிப்பு முறைகளைப் பின்பற்றுங்கள்.

• தூசி அல்லது மாசுத்துகள்கள் ஏதேனும் இருந்தால் அவற்றை அகற்றுவதற்காக உடனடியாகத் தூய்மையான தண்ணீரால் தலைமுடியை அலசுங்கள்.
• தலையோட்டை நன்றாகச் சுத்தம் செய்வதற்கு தலைமுடியைத் தலைமுடி கழுவும் திரவத்தால் கழுவுவது அவசியம்.
• தலைமுடிக்கு ஈரப்பதத்தை வழங்கி, அதன் வெளிப்புற அடுக்குகளை மென்மையாக்க தலைமுடி மென்மைப்படுத்தியைப் பயன்படுத்துவது அவசியம்.
• தலைமுடியில் ஈரப்பதத்தைத் தக்கவைத்து, சுருட்டலைக் குறைக்க தலைமுடி சீரம் பயன்படுத்துவது பயனுள்ளதாக இருக்கும்.
• சூடான காற்றைத் தரும் கருவிகளைப் பயன்படுத்துவதற்குப் பதிலாக, தலைமுடியை இயற்கையாகக் காற்றில் உலர விடுங்கள்.

இதையும் படிக்கவும் - பருவமழை கால முடி பராமரிப்பு வழக்கம்

மழைநீர் மற்றும் தலைமுடி குறித்த பொதுவான தவறான நம்பிக்கைகள்

மழைநீர் மற்றும் தலைமுடி குறித்து பல பொதுவான நம்பிக்கைகள் உள்ளன. ஆனால் அவை அனைத்தும் உண்மையானவை அல்ல. உண்மையைப் புரிந்துகொள்வது உங்கள் தலைமுடியைச் சிறப்பாகப் பராமரிக்க உதவும். 

மழையில் நனைந்த பிறகு தவிர்க்க வேண்டிய தவறுகள்

மழைக்காலத்தில் உங்கள் தலைமுடியை ஆரோக்கியமாக வைத்திருக்க, பின்வரும் பொதுவான தவறுகளைத் தவிர்க்கவும்:

• ஈரமான தலைமுடியுடன் தூங்க வேண்டாம் – இது பூஞ்சை வளர்ச்சி மற்றும் தலைமுடி சுருட்டலுக்கான வாய்ப்பை அதிகரிக்கக்கூடும்.
• ஈரமான தலைமுடியைக் கட்ட வேண்டாம் – ஈரமான தலைமுடி வலுவிழந்து இருப்பதால் எளிதில் உடைந்துவிடும்.
• பலத்த மழையில் நனைந்த பிறகு தலைமுடியைச் சுத்தம் செய்வதைத் தவிர்க்க வேண்டாம் – தூசி மற்றும் மாசுத்துகள்களை அகற்ற மென்மையான தலைமுடி கழுவும் திரவத்தைக் கொண்டு தலைமுடியைக் கழுவுங்கள்.
• உடனடியாக அதிக வெப்பத்தைப் பயன்படுத்த வேண்டாம் – முதலில் தலைமுடியை இயற்கையாகக் காற்றில் உலர விடுங்கள். தேவைப்பட்டால் பின்னர் குறைந்த வெப்பத்தைப் பயன்படுத்தலாம்.

தோல் மருத்துவரை எப்போது அணுக வேண்டும்?

இருப்பினும், மழையின் காரணமாக ஏற்படும் சில தலைமுடிப் பிரச்சினைகளுக்கு தகுதி பெற்ற மருத்துவரின் பரிசோதனையும் சிகிச்சையும் தேவைப்படலாம். பின்வரும் அறிகுறிகள் தீவிரமானதாக இருக்கக்கூடும் என்பதால், தோல் மருத்துவரை அணுகுங்கள்:

• அளவுக்கு அதிகமான தலைமுடி உதிர்வு
• தொடர்ந்து நீடிக்கும் பொடுகு
• குணமாகாமல் தொடர்ந்து இருக்கும் தலையோட்டில் அரிப்பு
• பூஞ்சைத் தொற்றுகள்
• தலையோட்டில் சிவந்து வீங்கிய பகுதிகள்
• தலைமுடி மெலிதாகுதல்

முடிவுரை

மழைநீர் உங்கள் தலைமுடிக்கு நன்மையாகவும் தீமையாகவும் இருக்கலாம். அதில் எந்த மாசுத்துகள்களும் இல்லாதபோது அது பயனுள்ளதாக இருக்கலாம். ஆனால் இத்தகைய நிலை மிகவும் அரிதாகவே காணப்படுகிறது. 

மாசுபாடு, தூசி, அழுக்கு மற்றும் பிற சுற்றுச்சூழல் மாசுத்துகள்கள் உள்ளிட்ட வெளிப்புற காரணிகளே பெரும்பாலும் மழைநீரை தலையோட்டுக்குத் தீங்கு விளைவிப்பதாக மாற்றுகின்றன.

உங்கள் தலைமுடியை ஆரோக்கியமாக வைத்திருக்க, மழையில் நனைந்தவுடன் தலைமுடியை உடனடியாகக் கழுவ வேண்டும். மேலும், மென்மையான தலைமுடி கழுவும் திரவத்தைப் பயன்படுத்தி தலையோட்டை எப்போதும் தூய்மையாக வைத்திருக்க வேண்டும். தலைமுடி மென்மைப்படுத்தி மற்றும் தலைமுடி சீரம் பயன்படுத்துவது தலைமுடிக்கு மென்மையையும் பளபளப்பையும் வழங்க உதவும்.